الجمعة، 18 يوليو 2014

تجربة شخصية (3)

قولنا قبل كده إن مريض ألزهايمر بيبقى عايش في واقع داخلي خاص بيه ومش معترف بأي حاجة تانية بتحصل حواليه وده بيخليه فاكر إنه واقع وسط مؤامرة من الناس إللي حواليه
والشيء الخطير في الموضوع ده إن المريض بيبقى شايف الحاجة على غير حقيقتها في أغلب الأوقات!
بيبقى شايف الصورة إللي هو شايفها في دماغه بس وغالبا بتكون صورة مختلفة تماما عن الواقع
زي ماقولت قبل كده إن والدي الله يرحمه كان شايف والدتي على إنها أمه!
وأخويا كمان كان بيتعامل معاه على إنه أخوه هو (عمي عليه رحمة الله)!
بنات أختي الاتنين كان بيتعامل معاهم على إنهم أنا وأختي وإحنا صغيرين!
والدي كان ساعات بيحاول يفتح باب الشقة بشاحن الموبايل.. هو كان شايفه على إنه مفتاح وكان بيحاول يستعمله في فتح الباب!
علشان كده لازم نتعامل مع التفاصيل الصغيرة جدا خلال تعاملنا مع مريض ألزهايمر.. بمعنى إذا مثلا قدمناله قطعة شيكولاتة لازم الأول نفكها من ورقتها لإنه ممكن ياكلها بالورقة
سوائل التنظيف لازم نبعد عبوتها عنه لإنه برضه ممكن يفتكرها ميه ويشربها
والدي مرة فتح التلاجة وطلع إزازة دوا كحة ولحقناه قبل ما يشربها على إنها ميه!
التفاصيل مهمة جدا في التعامل مع مريض ألزهايمر حفاظا عليه وعلى المرافقين ليه.

وبجانب إن مريض ألزهايمر بيشوف الحاجة على غير حقيقتها ممكن كمان يتكلم في حاجة ويبقى إللي يقصده حاجة تانية خالص.. بمعنى إنه ممكن يكون بيسأل عن حد ويتنرفز في السؤال ويتعصب ونكتشف في الآخر إنه جعان أو عطشان!
هو في ذهنه سامع نفسه بيقولنا إنه جعان لكن في الواقع هو بيقول كلام تاني خالص وبالتالي الردود الغريبة بتاعتنا بتعصبه
وكان دايما الدكتور بيطلب مننا إننا نعرض عليه الميه والأكل لإنه ممكن يجوع أو يعطش ويبقى مش عارف يبلغنا!
والدي الله يرحمه كنا بنعرض عليه كوباية الميه ويقولنا لأ مش عاوز وفي نفس الوقت بيمد إيده ويمسك الكوباية ويشرب!

مريض ألزهايمر هو عبارة عن طفل صغير داخل جسم كبير.. نحاول قدر الإمكان نتواصل معاه ونفهم طلباته واحتياجاته حفاظا عليه وعلى أنفسنا.
وده فيلم آنيمي بيعرف الناس بمرض ألزهايمر بشكل مُبسط علشان أقارب المريض يقدروا يفهموا الحالة إللي بيتعاملوا معاها بالضبط .
وندعوا الله بالشفاء لجميع المرضى.. اللهم آمين



هناك 4 تعليقات:

  1. السلام عليكم و رحمة الله و بركاته
    ممكن اسأل حضرتك عن كيفية التعامل مع العصبية الزائدة و رفض الأكل و الاستحمام ؟

    ردحذف
  2. وعليكم السلام ورحمة الله وبركاته
    العصبية الزائدة للأسف مالهاش حل غير الأدوية المهدئة بجانب التعامل مع المريض على إنه طفل صغير
    يعني لازم المحايلة والمدادية زي ما بنقول بالمصري
    بالنسبة للأكل لما يتحط الطبق قدامه ماياكولش لوحده
    حد يقعد ياكل معاه لإنه هايبقى شاكك في الأكل نفسه
    حد ياكل من طبقه الأول وبعدين يقعد يكمل أكل معاه في نفس المكان وقدامه
    بالنسبة للاستحمام شوفوا هو جايما بيزن على وبيطلب إيه بإلحاح واكدبوا عليه وقولوله انكم هاتعملوا الحاجة دي لو هو استحمى
    هو على ما يخلص حموم هايكون نسي وهاينام
    ربنا يشفي كل مريض يا رب ويرحمنا جميعا برحمته
    اللهم آمين

    ردحذف
  3. مرحبا
    الموضوع جميل وشكرا على الشرح
    امي مريضة زهايمر حسب وصف الاطباء لكن تصرفاتها واعراضها تختلف تماما
    امي ببداية المرض كانت تتحرك كتير وتروح وتيجي بالبيت تدور علي انا ابنتها ازا مش موجوده قدامها.. وذات الشيء بابا..
    امي كانت تفضل انها تروح الدكتور معي قبل وبعد المرض.. وبفتره اكتشاف المرض كانت تردد السوال ذاته اي شي اي سوال كتير..
    بعدين صار عندها عدم اتزان بالمشي وما تقدر تقف حتا صارت على كرسي متحرك!!
    وحتا اصبحت غير قادره عالكلام.. ولكنها هادئة جدا.. تشوف تي في.. تسرح.. حتى صارت عالتخت غير قادره تقوم بمهامها لوحدها وتستعمل حفاض للكبار..
    كل هاد صار خلال 3 سنين..
    اشك انه زهايمر لكن جميع الاطباء قالوا انه زهايمر!

    ردحذف
  4. ربنا يتم شفاها على خير ويهون عليكم .. اللهم آمين
    حضرتك أنا مش طبيبة أنا عملت المدونة باحكي فيها تجربتي الشخصية مع والدي الله يرحمه
    لإن للأسف المرض مجهول بنسبة كبيرة في مجتمعنا العربي وفي نفس الوقت بدأ ينتشر
    عامة الأشعة المقطعية بتكون الفيصل في الحكم على المرض
    لإن تضاؤل حجم المخ عن الحجم الطبيعي بيكون علامة حاسمة على وجود مرض ألزهايمر
    وزي ما قولت فب الأول إن المرض عبارة عن ضمور في الخلايا العصبية المركزية (المخ)
    والضمور ماحدش يقدر يعرف هو هايبدأ في أي جزء من خلايا المخ
    ممكون يكون الجزء الخاص بالكلام أو بالحركة أو بالفهم...
    عامة خدي رأي أكتر من طبيب وواظبي على جرعات العلاج إللي الدكتور كاتبها
    وربنا يطمنكم عليها

    ردحذف